Kherwood Indian Recipes

  પાલક રાયતું સામગ્રી :  પાલકનાં પાન-૮ થી ૧૦ નંગ(જરૂર મુજબ), દહીં- ૨૫૦ ગ્રામ, મીઠું-સ્વાદ મુજબ,  ચાટ મસાલો-૧-ચમચી,  તેલ-તળવા માટે. રીત :  સૌ પ્રથમ પાલકને ધોઈ કોરી કરી ઝીણી સમારી લો. એક પૅનમાં તેલ ગરમ મૂકો. તેલ ગરમ થાય એટલે તેમાં સમારેલી પાલક ઉમેરી કડક થવા દો. તેને ઝારામાંથી બહાર કાઢી પેપર પર મૂકો જેથી તેમાં રહેલું તેલ છાપાના કાગળમાં શોષાઈ જાય.ત્યારબાદ દહીંને એક બાઉલમાં લઈ વલોવી લો. તેમાં સ્વાદ મુજબ મીઠું, જીરા પાઉડર અને ચાટ મસાલો ઉમેરી મિક્સ કરી લો. ત્યારબાદ તળેલી પાલક ઉમેરી તેને હલાવી લો અને સર્વ કરો. ઉપરથી થોડી પાલક સજાવટ માટે મૂકો.

  ચોકલેટ ફકાસ સામગ્રી :  મોળાં બિસ્કિટ ૨૦ નંગ,  કન્ડેન્સ મિલ્ક ૧/૪ કપ,  ચોકલેટ ચિપ્સ જરૂર મુજબ,  મેલ્ટેડ ચોકલેટ ૧ કપ, ચોકલેટ  સોસ જરૂર મુજબ લેવાં. રીત :  સૌ પ્રથમ મોળાં બિસ્કિટને મિક્સરમાં કશ કરી ત્યારબાદ બિસ્કિટના ભૂકામાં કન્ડેન્સ મિલ્ક અને ચોકલેટ ચિપ્સ ઉમેરી કઠણ લોટ બાંધવો અને તેને ૧ કલાક માટે ફ્રીઝમાં સેટ થવા મૂકવો. પછી એક પૅનમાં પાણી લેવું અને તેની ઉપર બીજું વાસણ મૂકી તેમાં ચોકલેટ મેલ્ટ કરવી. (આ પદ્ધતિને ડબલ બોઈલર કહેવાય). ત્યારબાદ ફ્રીઝમાં મૂકેલા ફકાસને કાઢી તેની ઉપર મેલ્ટેડ ચોપડવી અને ફરી ૧ કલાક માટે ફ્રીઝમાં સેટ થવા મૂકવા. સેટ થઈ ગયા બાદ તેને કટ કરવા અને ચોકલેટ સોસ રેડી તેને સર્વ કરવા. તૈયાર છે ચોકલેટ ફકાસ.

  પોટેટો પેન કેક સામગ્રી :  છીણેલા બટાકા-૧ બાઉલ, મીઠું સ્વાદ જરૂર મુજબ , ટામેટાં-જરૂર પ્રમાણે,  આદું-મરચાંની પેસ્ટ-૧ ટે સ્પૂન,  દૂધી-છીણેલી (૧/૨ બાઉલ), મરચું પાઉડર- જરૂર પ્રમાણે,  લીંબુ-૧/૨ ટી.સ્પૂન,  ખાંડ-૧ ટી સ્પૂન. રીત :  સૌપ્રથમ એક બાઉલમાં છીણેલા બટાટા, દૂધી, ટામેટાં, આદું-મરચાંની પેસ્ટ મિક્સ કરો. ત્યારબાદ તેમાં મીઠું, મરચું પાઉડર, લીંબુ, ખાંડ, ગરમ મસાલો બધું જ મિક્સ કરી લેવું. હવે બેકિંગ ટ્રે લઈ તેના પર આ મિશ્રણ ટ્રે પર તેલ લગાવીને પૅનકેકના શેપમાં પાથરી લેવું. આ રીતે ૩થી ૪ નાની પૅનકેક તૈયાર કરી લેવી. ત્યારબાદ પ્રી હીટ કરેલા ઓવનમાં ૧૮૦ અંશ પર ૧૦ મિનિટ બૅક કરી લેવું. ત્યારબાદ બહાર લઈ બીજી બાજુ ફેરવી તેલ લગાવી ફરી ૧૦ મિનિટ બૅક કરી લેવું અને દહીં અથવા તો કેચઅપ સાથે સર્વ કરવું.

  બેંગન ચિપ્સ સામગ્રી : જાડાં દળવાળાં રીંગણ,  મીઠું સ્વાદાનુસાર,  મરી,  વિનેગર ૧/૨ કપ,  તેલ. રીત : રીંગણની લાંબી ચિપ્સ કરી તેને પાંચ-દસ મિનિટ સુધી વિનેગરમાં રાખવાં. એક વાટકીમાં મીઠું, મરી મિક્સ કરવાં. રીંગણની ચિપ્સને વિનેગરમાંથી બહાર કાઢી ડ્રાય કરી તેના પર તેલ લગાવી અને મીઠું-મરી લગાડવાં. તડકામાં આઠ-દસ દિવસ રાખવાં.એકદમ ડ્રાય થયા બાદ એરટાઈટ બરણીમાં ભરવાં. વેરિએશન- બેંગનની ગોળ સ્લાઈસ પણ કરાય.

 ખજૂર-ખસખસનું શરબત સામગ્રી ૨ મોટા ચમચા ખસખસ,  ૧૦ ખજૂર(બી કાઢેલા),  ૨ કપ દૂધ,  ૨ લીલી એલચીનો પાવડર,  ૨ મોટા ચમચા મધ. રીત :  ખજૂર તથા ખસખસને પલાળીને બારીક પીસી લો. પછી તેની ગાળીને તેમાં દૂધ મિક્સ કરી એલચીનો પાઉડર નાખી ઉકાળો. પછી ઠંડુ કરી ગ્લાસમાં ભરી જરૂર પ્રમાણે મધ નાખી સર્વ કરો.

  વેજ સિઝલર સામગ્રી ૨૦-૨૫ આખા મરચા,  ૨ મોટાં ટમેટાં,  ૨-૩ મોટી ડુંગળી,  ૨-૩ કેપ્સિકમ,  ૧ મધ્યમ આકારનું ફ્લાવર,  ૨ ચમચી કોર્નફ્લોર,  ૧/૨ ચમચી સફેદ મરચુ,  ૧/૪ ચમચી આજીનો મોટો સ્વાદ મુજબ મીઠું,  ૧ કપ સરકો,  ૨ ચમચા હોટ ચિલી ગાર્લિક સોસ,  કોબીજનાં ૫-૬ પાન,  ૮-૧૦ લસણની કળી. રીત :  ટમેટાં સમારી લો. કઢાઈમાં માખણ ગરમ કરો. તેમાં ટમેટાં નાખીને ૩-૪ મિનિટ સુધી સાંતળો પછી તેમાં હોટ ચીલી ગાર્લિક સોસ નાખીને ૨ મિનિટ સુધી સાંતળો.એકબીજા ફ્રાઈન પેનમાં ૧ ચમચી માખણ ગરમ કરી તેમાં ડુંગળી અને કેપ્સિકમ ગુલાબી રંગે સાંતળી તેન ટમેટાં સોસમાં નાખી દો. ફ્લાવરને સમારી ૫ મિનિટ ગરમ પાણીમાં રાખો. તેને પ્લેટમાં કાઢીને કોર્નફ્લોર, મીઠું, સફેદ મરચું, આજીનોમોટો નાખી ૧૦-૧૫ મિનિટ સુધી રહેવા દો. એક કઢાઈમાં તેલ ગરમ કરો તેમાં ફુલાવરને સોનેરી રંગે તળો. હવે ૧ ચમચી કોર્નકૂલોર ૨-૩ ચમચી પાણીમાં ઘોળી તેને કેપ્સિકમમાં મિક્સ કરો. તેજ આંચ પર પાણી શોષાઈ જાય ત્યાં સુધી શેકો. જ્યારે તેલ છૂટુ પાડવા લાગે ત્યારે ફૂલાવર રાખીને ૨-૩ વખત હળવા હાથે હલાવો. સિઝલરની સામગ્રી તૈયાર થઈ ગઈ....

  દહીં ચનેકી સબ્જી સામગ્રી :  ૧/૨ કપ દહીં ૨ કપ પલાળીને બાફેલા કાળા ચણા ૨ ટેબલ સ્પૂન ચણાનો લોટ ૧/૨ ટીસ્પૂન હળદર ૧ ટીસ્પૂન લીલાં મરચાંની પેસ્ટ ૧ ટીસ્પૂન લાલ મરચાંનો પાઉડર મીઠું, સ્વાદાનુસાર  ૧/૨ ટેબલસ્પૂન તેલ ૧ ટીસ્પૂન જીરું ૧/૨ ટીસ્પૂન રાઈ સજાવવા માટે ૨ ટેબલસ્પૂન બારીક સમારેલી કોથમીર રીત :  દહીં ચનેકી  સબ્જી બનાવવા માટે એક ઊંડા બાઉલમાં દહીં, ચણાનો લોટ, હળદર, લીલાં મરચાંની પેસ્ટ, લાલ મરચાંનો પાઉડર, મીઠું અને એક કપ પાણી ભેગાં કરો અને કોઈ ગઠ્ઠો ન રહે ત્યાં સુધી વિસ્કનો ઉપયોગ કરીને સારી રીતે મિક્સ કરી દો. એક બાજુ રાખો. ઊંડી નોન-સ્ટિક કડાઈમાં તેલ ગરમ કરી, તેમાં જીરું અને રાઈ નાખો. જ્યારે દાણા તતડવા માંડે ત્યારે તેમાં કાળા ચણા અને દહીં-ચણાના લોટનું મિશ્રણ નાંખી બરાબર મિક્સ કરી મધ્યમ તાપ પર ૨ મિનિટ માટે સતત હલાવતા રહી રાંધી લો. કોથમીર વડે સજાવી તરત જ પીરસો.

ચણાના લોટનો શીરો સામગ્રી :   ૩/૪ કપ ચણાનો લોટ ૭ ૩/૪ કપ દૂધ પ ટેબલસ્પૂન પીગળાવેલું ઘી ૩/૪ કપ સાકર ૧/૪ ટીસ્પૂન એલાયચીનો પાઉડર ૧ ટેબલ સ્પૂન સમારેલી બદામ ૧ ટેબલસ્પૂન સમારેલાં પિસ્તાં સજાવવા માટેની સામગ્રી ૧ ટેબલસ્પૂન સમારેલી બદામ  ૧ ટેબલસ્પૂન સમારેલાં પિસ્તાં રીત :  ચણાના લોટનો શીરો બનાવવા માટે એક બાઉલમાં ચણાનો લોટ, ૨ ટેબલસ્પૂન દૂધ અને ૧ ટેબલસ્પૂન ઘી મેળવી સારી રીતે મસળી અને ગૂંદીને કિણક જેવું તૈયાર કરો. તેને ૧૦ મિનિટ માટે બાજુ પર રાખો. આ કણિકને  છીણી વડે ઝીણું ખમણી લો અને બાજુ પર રાખો. એક ખુલ્લા વાસણમાં બાકી રહેલું ઘી ગરમ કરી તેમાં છીણેલા લોટનું મિશ્રણ મિક્સ કરી ધીમા તાપ પર ૮થી૧૦ મિનિટ સુધી સતત હલાવતા રહી રાંધીને બાજુ પર રાખો. હવે બાકી રહેલું દૂધ અને ૩/૪ કપ પાણી એક ઊંડી કઢાઈમાં ગરમ કરી તેમાં તૈયાર કરેલું લોટનું મિશ્રણ મેળવી મધ્યમ તાપ પર ૨થી ૩ મિનિટ સુધી સતત હલાવતા રહી રાંધી લો. સાકર,એલાયચીનો પાઉડર, બદામ અને પિસ્તાં ઉમેરો અને મધ્યમ તાપ પર સતત હલાવતા રહી ૭ થી ૮ મિનિટ સુધી રાંધો. ચણાના લોટના શીરાને બદામ અને પિસ્તાં વડે સજાવીને ગરમગરમ પીરસો.

  ટ્રોપિકલ ફ્રૂટ સન્ડે જિંજર ફ્લેવર સામગ્રી :  વેનિલા આઈસક્રીમ ૨૦૦ ગ્રામ,  મિલ્ક પાઉડર ત્રણ ચમચી,  જિંજર ક્રશ ત્રણ ચમચી, મિલ્કમેઈડ ૧/૨ કપ, બ્રેડ ક્રમ્સ ચાર ચમચી, ફૂટ એસેન્સ બેથી ત્રણ ડ્રોપ્સ. સજાવવા- મનપસંદ ફૂટ્સ એક કપ,  વેનિલા આઈસક્રીમ,  બ્રેડની તળેલી સ્ટિક અથવા ગ્રીલ કરેલી સ્ટિક. રીત :   (૧) આઈસક્રીમ, મિલ્ક પાઉડર, મિલ્ક મેઈડ, બ્રેડ ક્રમ્સ, જિંજર ક્રશ તથા એસેન્સ નાખી મિક્સરમાં ચર્ન કરો. ફીઝમાં એક કલાક માટે ચિલ્ડ કરો. (૨) સર્વિંગ બાઉલમાં ડેઝર્ટ ભરી ઉપર મિક્સ ફ્રૂટના પીસ મૂકી ફરી બાઉલને એક કલાક માટે સેટ કરો. સર્વ કરતાં પહેલાં ઉપર આઈસક્રીમ સ્કૂપથી મૂકો અને બ્રેડની સ્ટિકથી ગાર્નિશિંગ કરો

  કોર્ન કટલેસ સામગ્રી :  ૧ નંગ મકાઈ (૫૦૦ગ્રામ),  ૨ ચમચી ગાજર બાફેલાં,  ૨ ચમચી વટાણા બાફેલા,  ૨ નંગ બટાટા બાફેલા,  જોઈતા પ્રમાણમાં મીઠું,  ૧ લીંબુનો રસ,  ૨ ચમચી આદું-મરચાંની પેસ્ટ,  ૨ ચમચી કોથમીર,  અડધી ચમચી લાલ મરચું,  અડધી ચમચી ગરમ મસાલો,  જોઈતા પ્રમાણમાં બ્રેડ ક્રમ્સ,  ૪ ચમચી કોર્નફ્લોર (મેંદો). રીત :  સૌપ્રથમ મકાઈને બાફી લો. ઠંડી થયા બાદ તેના દાણા કાઢી લો. અડધા દાણાને મિક્સર જારમાં ક્રશ કરી લો. થોડા આખા દાણા રહેવા દો. હવે એક બાઉલમાં ક્રશ કરેલા મકાઈનો માવો, આખા મકાઈના દાણા, બાફેલાં ગાજર-વટાણા તથા બાફેલા બટાટાનો માવો બનાવી તેમાં ઉમેરી બરાબર મિક્સ કરો. હવે તેમાં સ્વાદાનુસાર મીઠું, ૧ લીંબુનો રસ તથા બધા મસાલા ઉમેરો. તેમાં જોઈતા પ્રમાણમાં બ્રેડ ક્રમ્સ તથા કોર્નફ્લોર ઉમેરી બરાબર મિક્સ કરી લો. આ માવામાંથી કટલેસનો તમને મનગમતો આકાર આપો. તેને આકાર આપ્યા બાદ બ્રેડ ક્રમ્સમાં રગદોળી લો. હવે એક પૅનમાં તેલ ગરમ મૂકી તેને આછી ગુલાબી થાય ત્યાં સુધી તળી લો. ગરમ ગરમ પીરસો. બ્રેડ ક્રમ્સના લીધે ઉપરથી ક્રિસ્પી અને અંદરથી સોફ્ટ બનશે. અત્યા...

  આટા સ્વીસ રોલ સામગ્રીઃ બહારના પડ માટે : ઘઉંનો લોટ ૧ કપ,  કોપરાનું છીણ-૨ ચમચી, દળેલી ખાંડ-૩ ચમચી,  એલચી પાઉડર, ૧/૪ ચમચી,  કેસર-ચપટી,  દૂધ-જરૂર મુજબ ઘી-૨ ચમચી. સ્ટફિંગ માટે : મોળો માવો-૧૦૦ ગ્રામ,  દળેલી ખાંડ-૫૦ ગ્રામ, એલચી પાઉડર ૧/૪ ચમચી રીત :  સૌપ્રથમ ઘઉંના લોટને ચાળીતેમાં દળેલી ખાંડ, કોપરાનું છીણ, એલાયચી પાઉડર દૂધમાં ઓગાળી કેસરવાળું દૂધ નાખી પૂડલો પડે એવું બટર તૈયાર કરવું. ત્યારબાદ નોનસ્ટિક તવી ગરમ કરી તેના પર પૂડલો પાડી બંને બાજુ ઘી મૂકી પૂડલો શેકી ઠંડો થવા રાખવો. તે ઠંડો થાય ત્યાં સુધી માવો છીણી તેમાં દળેલી ખાંડ, એલાયચી પાઉડર મિક્સ કરી પૂરણ તૈયાર કરવું. તે પૂડલા પર લગાવી ગોળ રોલ વાળવો. રોલ થોડો ટાઈટ વાળવો ત્યારબાદ તેના નાના નાના પીસ કરી સર્વ કરવા. નોંધ : તમારે ચાંદીનો વરખ લગાવવો હોય તો લગાવી શકો છો. કાજુ-બદામનો પાઉડર કરી સ્ટફિંગમાં નાખવો હોય તો નાખી શકાય.

 ફ્રેશ રાસબેરી માર્ગારિટા સામગ્રી :  આઈસ સિઝનિંગ કરેલા ગ્લાસ,  રાસબેરી ૮થી ૧૦ નંગ, લાલ રંગ ચપટી, (મરજિયાત), દળેલી સાકર ચારથી પાંચ ચમચી, સ્ટ્રોબેરી અથવા મિક્સ ફ્રૂટ એસેન્સ બેથી ત્રણ ડ્રોપ,  પાણી ત્રણથી ચાર ગ્લાસ,  કોર્નફ્લોર ૧ ચમચી,  આદું રસ ત્રણ ચમચી,  વરિયાળી પાઉડર એક ચમચી,  સફેદ મરી પાઉડર એક ચમચી. રીત :   (૧) રાસબેરીના ઠળિયા કાઢી મિક્સરમાં તેનો પલ્પ બનાવો. તેમાં પાણી નાખી તેમાં સાકર એસેન્સ, કોર્નફ્લોરને થોડા પાણીમાં ઓગાળી બોઈલ કરી ઠંડો કરી મિક્સ કરો. તેમાં આદું રસ, વરિયાળી પાઉડર, સફેદ મરી પાઉડર નાખી ફરી મિક્સરમાં ચર્ન કરો.  (૨) મિશ્રણને ફ્રીઝરમાં સેટ કરો. (૩) ત્યારબાદ ફરી મિક્સરમાં ચર્ન કરી સર્વિંગ ગ્લાસમાં મિશ્રણ રેડવું. ઉપરથી આઈસક્રીમ નાખી હલાવી સર્વ કરો. સ્વાદ મુજબ ગળપણમાં ફેરફાર કરવો. આઈસ સિઝનિંગ ગ્લાસ કરવા માટે ગ્લાસને એકદમ પાણીવાળો કરી ઊંધો કરી ફ્રીઝમાં અડધો કલાક રાખવો જેથી ગ્લાસની બોર્ડર બની જશે.

  તલ, સિંગના લાડુ સામગ્રી :  ૧ વાટકી સફેદ તલ ૧ વાટકી સિંગદાણાનો ભૂકો અડધી વાટકી કોપરાનું છીણ અડધી વાટકી અખરોટ ૨૦૦ ગ્રામ ગોળ ૩ ચમચી ઘી રીત :  સૌ પ્રથમ સિંગદાણાને શેકી ફોતરાં કાઢી ભૂકો કરો. તલને પણ શેકી લો અને ભૂકો કરો. એક નોનસ્ટિક કડાઈમાં ગોળ-ઘી નાખી ધીમા તાપે હલાવો. ગોળ ઓગળે એટલે તેમાં તલનો ભૂકો, સિંગદાણાનો ભૂકો, કોપરાનું છીણ, અખરોટનો ભૂકો નાખી હલાવો. હવે તેના નાના નાના લાડુવાળો. આ લાડુ કેલ્શિયમથી ભરપૂર છે. પગનો દુખાવો, ઘૂંટણનો દુખાવો વગેરેમાં આ લાડુ સારું કામ કરે છે.

  ઇન્સ્ટન્ટ વડાં સામગ્રી :  ૧ વાટકી ફોતરાં વગરની મગદાળ,  ૩ લીલાં મરચાં,  એક આદુંનો ટુકડો,  કોથમીર,  ૧ ચમચી સોડા,  તળવા માટે તેલ રીત :  સૌપ્રથમ ફોતરાં વગરની મગદાળને મિક્સરમાં કોરી જ ક્રશ કરી લો. તેમાં પાણી નાખી પંદર મિનિટ સુધી રહેવા દો. ફરીથી તેને મિક્સરમાં નાખી તેમાં લીલાં મરચાં, આદું, કોથમીર નાખી ક્રશ કરી લો. ત્યારબાદ આ ખીરાને એક બાઉલમાં કાઢી લો. તેમાં મીઠું અને સોડા નાખી હલાવો. એક કડાઈમાં તેલ મૂકી ગરમ થાય પછી તેમાં ખીરામાંથી નાનાં વડાં તળી લો.એકદમ મસ્ત વડાંને સોસ સાથે સર્વ કરો.

  બાજરાના પૂડલા સામગ્રી : ૧ વાટકી બાજરાનો લોટ,  ઝીણાં સમારેલાં ટામેટા અને ડુંગળી ચાર ચમચી,  ૨ નંગ લીલાં મરચાં,  કોથમીર,  મીઠું તેલ રીત : સૌપ્રથમ બાજરાના લોટને એક બાઉલમાં લો અને તેમાં થોડું પાણી નાખી ખીરું તૈયાર કરી લો. પછી તેને પંદર મિનિટ સુધી રહેવા દો. ત્યારબાદ ઝીણાં સમારેલા ટામેટા અને ડુંગળી તેમાં નાખો. લીલાં મરચાંને પણ કટકા કરી નાખો. કોથમીર, મીઠું નાખી એકરસ કરો. હવે નોનસ્ટિક તવીમાં તેલ મૂકી ખીરામાંથી નાના પૂડલા તૈયાર કરો. તેને બંને બાજુથી શેકી લો. આ પૂડલાને સોસ કે દહીં સાથે સર્વ કરો.

 Recipes દહીં બુંદી ચાટ  સામગ્રી : ૧ વાટકી તીખી બુંદી ૧ વાટકી દહીં ૩ ચમચી દાડમના દાણા ૩ ચમચી ઝીણી સેવ તીખી ચટણી, લીલી ચટણી અને ખજૂરની ચટણી ૩ ચમચી મસાલા સિંગ ૫ નંગ પાપડી પૂરી રીત : સૌપ્રથમ બાઉલમાં એક તીખી બુંદી લો, હવે દહીંમાં મીઠું અને ખાંડ નાખી બ્લેન્ડરથી બ્લેન્ડ કરો. પછી તેના પર દહીં નાંખો. તેમાં દાડમના દાણા, ઝીણી સેવ, મસાલા સિંગ અને તીખી ચટણી, ગળી ચટણી, લીલી ચટણી નાખો, છેલ્લે કોથમીરથી ગાર્નિશ કરો. તો બનાવો ચટપટી દહીં બુંદી ચાટ...